Þarf alltaf „eitt­hvað til að kjamsa á“ daginn eftir skaup

Samkvæmt niðurstöðum skoðanakannanar Reykjavík síðdegis um sögðu yfir fimmtíu prósent svarenda skaupið hafa verið frábært, rúmur fjórðungur sagði það yfir meðallagi, þrettán prósent í meðallagi, fjögur prósent undir meðallagi og tæp sex prósent sögðu það lélegt.

Sjá einnig: Enginn for­maður Sjalla, Kaffi Vest-samsærið og vinir skoðana­bræðra

Þannig sögðu tæp 77 prósent skaupið frábært eða yfir meðallagi.

Telja sig skyldug til að taka þátt

Hannes Þór Arason og Allan Sigurðsson, leikstjórar Áramótaskaupsins, segjast hafa fundið fyrir mjög góðum viðbrögðum áhorfenda. 

„Miklu meira jákvætt en maður var tilbúinn í, af því að þetta fær oft mikla gagnrýni og maður var alveg tilbúinn í allt saman,“ segir Allan. 

Opnunaratriði skaupsins, þegar Þorsteinn Bachmann leikur Guðmund Inga Kristinsson menntamálaráðherra að reita af sér málfarsvillum, vakti mikla lukku sumra en hefur sætt gagnrýni annarra. Eiríkur Rögnvaldsson málfræðingur sakaði höfunda skaupsins til dæmis um málfarsfordóma í garð ráðherrans.

„Það þarf alltaf að vera eitthvað til að kjamsa á daginn eftir. Það hefði verið skrítið ef það hefði ekki verið,“ segir Hannes.

Mikill fjöldi leikara tók þátt í Skaupinu, en Hannes og Allan segja alla jafna lítið mál að sannfæra leikara um að vera með.

„Skaupið er svona verkefni þar sem allir leikarar voru til í þetta, þegar þeir fengu kallið,“ segir Allan.

„Þú segir ekki nei við skaupinu,“ skýtur Hannes inn í.

„Og líka fyrir bæði okkur og höfundana er þetta ákveðið, svo ég sletti, jury duty fyrir fólk í skemmtanabransanum. Þegar þú færð kallið, þá tekurðu því,“ segir Allan.

Léku lausum hala í hlutverki valkyrja

Vakin er athygli á að eitt atriðið í skaupinu hafi að hluta til verið spunnið upp af leikurum á staðnum, en það var pólitísk útgáfa af Bannað að hlæja. Mál manna er að Sóli Hólm hafi farið á kostum sem Inga Sæland og álitsgjafar sögðu í kvöldfréttum RÚV á nýársdag að frammistaða hans hafi hreinlega staðið upp úr.

Allan segir að fyrri hluti atriðisins hafi verið samvinna höfunda og leikara.

„Svo fór maður að sjá hvað Sóli er mikill meistari í að vera Inga Sæland þannig að hann fékk bara algjörlega að improvísera,“ segir Allan.

„Það var ákveðin beinagrind, við vissum hvernig við ætluðum að stilla þessu upp. Svo fengu leikararnir að spila svolítið með þetta,“ segir Hannes.

Viðtalið í heild sinni má nálgast hér að neðan.