Dag­skráin í dag: Verður Manchester United á­fram í drauma­landi Carrick?

Klukkan hálf eitt á Sýn Sport Viaplay hefst bein útsending frá leik Hertha BSC og Darmstadt 98 í þýsku B-deildinni í fótbolta. Íslenski landsliðsmaðurinn Jón Dagur Þorsteinsson spilar með liði Hertha. 

Það er síðan klukkan tvö sem enski boltinn byrjar að rúlla með leik Manchester United og Fulham á Sýn Sport. Michael Carrick hefur farið vel af stað í starfi sem þjálfari Manchester United og freistar hann þess að ná þriðja sigrinum í röð í dag gegn Fulham eftir að hafa lagt að velli topplið Arsenal og Manchester City. 

Á sama tíma, á Sýn Sport 2 hefst viðureign Aston Villa og Brentford. Í Skírisskógi taka svo heimamenn í Nottingham Forest á móti Crystal Palace. 

Klukkan hálf þrjú mætast svo Stuttgart og Freiburg á Sýn Sport Viaplay í þýsku úrvalsdeildinni. 

Stórleikur dagsins í ensku úrvalsdeildinni er svo án efa viðureign Manchester City og Tottenham sem hefst klukkan hálf fimm og verður sýnd í beinni útsendingu á Sýn Sport. Að þeim leik loknum tekur Sunnudagsmessan við þar sem farið verður yfir allt það helsta úr yfirstandandi umferð enska boltans. 

Klukkan sjö í kvöld á Sýn Sport Viaplay hefst svo bein útsending frá sterku pílumóti, PDC World Masters.