Kröfunni hafnað og starfs­mönnunum sleppt

Samkvæmt heimildum Vísis lést konan á miðvikudag í síðustu viku eftir að hafa þegið líknandi meðferð á hjúkrunarheimilinu um nokkurt skeið. Rannsókn lögreglu hófst á laugardag en á sunnudag óskaði ríkissaksóknari eftir því við Lögregluna á Suðurlandi að hún tæki yfir rannsóknina af kollegum sínum í Vestmannaeyjum vegna tengsla laganna varðar í Eyjum við hina látnu.

Fjölskyldu konunnar sem lést grunaði ekki að andlátið gæti hafa borið að með saknænum hætti fyrr en Lögreglan á Suðurlandi hafði samband við hana um helgina. Hún var að undirbúa útför konunnar þegar lögregla tilkynnti henni um að rannsókn væri hafin á andlátinu. Útförin átti að fara fram síðar í vikunni en nú hafa jarðneskar leifar konunnar verið fluttar upp á land til krufningar.

Jón Gunnar Þórhallsson, yfirlögregluþjónn hjá Lögreglunni á Suðurlandi, segir að verið sé að fara yfir niðurstöðu héraðsdóms við gæsluvarðhaldskröfunni en hún verði kærð til Landsréttar.