Spila styrktarleik til minningar um Pat­rek: „Hans er sárt saknað“

Leikurinn hefst klukkan 19.45 í Skautahöllinni í Laugardal.

Bjarni Helgason, varaformaður íshokkídeildar Skautafélags Reykjavíkur, segir að fé verði safnað til að styðja við fjölskyldu Patreks. Nærfjölskylda hans mætti einmitt á leikinn.

Upphitun á ís hófst klukkan 18.45 þar sem liðsmenn voru klæddir í treyjur merktar Patreki.

„Hokkísamfélagið stendur með þeim [fjölskyldunni], og SR,“ sagði Bjarni, en Patrekur æfði einmitt með börnum hans. „Hann var góður og indæll strákur, mikill húmoristi og hans er sárt saknað af SR og öllu samfélaginu.“