Sló 30 ára gamalt Ís­lands­met

Júlía Kristín stundar nám við Rice University í Texas í Bandaríkjunum og var meðal keppenda á Tyson Invitational, sterku silfurmóti sem fram fór í Bandaríkjunum um helgina. Margt frambærilegasta frjálsíþróttafólk heims keppti á mótinu, til að mynda spretthlauparinn Noah Lyles sem fagnaði sigri í 200 metra hlaupi á 20,56 sekúndum.

Júlía keppti í 60 metra grindahlaupi og hafnaði í 5. sæti á nýju Íslandsmeti og skólameti þegar hún hljóp á 8,25 sekúndum. Saira Prince var fyrst í mark á 8,13 og Salieci Myles önnur á 8,14.

Adeyah Brewster og Skye Tolbert höfnuðu í þriðja og fjórða sæti, báðar á 8,25 líkt og Júlía, en voru nokkrum þúsundhlutum úr sekúndu á undan nýja Íslandsmethafanum.

Júlía bætti Íslandsmet Guðrúnar Arnardóttur sem var sett árið 1996 upp á 8,31 sekúndu, en Guðrún jafnaði metið árið 2000, sama ár og hún varð í 7.sæti á Ólympíuleikunum í Sydney í 400m grindarhlaupi.

Hin tvítuga Júlía Kristín var að vonum ánægð að hlaupi loknu en með árangrinum setti hún jafnframt skólamet í Rice University.

„Ég kom með eitt markmið inn í mótið og það var að hlaupa átta tuttugu og eitthvað. Ég sagði það við pabba um morguninn áður en ég hljóp,“ segir Júlía og bætir við:

„Ég hef haft augun á metinu síðan í vetur og var rosalega ánægð að hafa náð því. Það var gaman að slá tvær flugur í einu höggi og hlaupa skólamet í leiðinni. Formið er geggjað og ég er spennt fyrir því sem er fram undan.“