Taka um­sókn Moderna til skoðunar eftir allt saman

Moderna sækist eftir markaðsleyfi fyrir flensusprautu fyrir eldra fólk sem byggist á svonefndri mRNA-tækni. Bóluefnið er það fyrsta gegn inflúensu sem þróað er með tækninni sem gerði mönnum kleift að framleiða bóluefni gegn Covid-19 á mettíma.

Upphaflega hafnaði stofnunin að taka umsóknina til skoðunar í síðustu viku en slíkt er sagt fáheyrt. Bar stofnunin fyrir sig að Moderna hefði ekki fylgt leiðbeiningum hennar um klínískar tilraunir með bóluefnið. Forstjóri Moderna hafnaði því og sagði stofnunina hafa gefið grænt ljós á hönnun rannsóknarinnar.

Nú segja bandarískir fjölmiðlar að lyfjastofnunin hafi snúið við fyrri ákvörðun sinni. Fyrirtækið segir að það sækist eftir flýtimeðferð á umsókninni fyrir fólk sem er 65 ára eða eldra. Umsókn um leyfi fyrir aldurshópinn 50-64 ára fari í hefðbundinn farveg. Lyfjastofnunin ætli að segja af eða á í ágúst.

Fái bóluefnið skilyrt markaðsleyfi gæti fólk 65 ára og eldra fengið nýja bóluefnið fyrir næstu flensutíð næsta vetur, að því er segir í frétt New York Times. Moderna segist hafa skuldbundið sig til þess að gera viðbótarrannsókn á áhrifum bóluefnisins á eldra fólk eftir að það kemur á markað.

Hætt við milljarða króna fjárfestingar í mRNA-tækni

Þrátt fyrir árangur af mRNA-bóluefnum gegn Covid-19 og að Nóbelsverðlaunin í læknisfræði hafi nýlega verið veitt vísindamönnum sem þróuðu tæknina hefur alríkisstjórn Bandaríkjanna horn í síðu hennar.

Þegar hefur verið hætt við hundruð milljóna dollara fjárfestingar í mRNA-bóluefnum og lyfjum vegna óvildar ríkisstjórnar repúblikana en Robert F. Kennedy yngri, einn helsti andstæðingur bóluefna í heiminum undanfarna áratugi, er nú heilbrigðisráðherra Bandaríkjanna.

Yfirmaður deildar lyfjastofnunarinnar sem annast bóluefni hafnaði því að taka umsókn Moderna um flensusprautuna til meðferðar, þvert á ráðleggingar hans eigin sérfræðinga.