Heitur matur í boði á ný

Framleiðslueldhúsinu á Vitatorgi var lokað í byrjun mánaðar eftir að listeríubaktería fannst þar við reglubundna sýnatöku. Í kjölfarið þurfti að loka eldhúsinu og forgangsraða heimsendum mat og því hefur ekki verið matur á boðstólum í félagsmiðstöðvunum undanfarnar vikur.

Samningurinn, sem gildir fyrst um sinn í tvo mánuði, er upp á allt að þúsund máltíðir á dag en framleiðslueldhúsið á Vitatorgi framleiddi allt að 900 máltíðir á dag.

„Þann 29. janúar síðastliðinn samþykkti borgarráð að ráðist yrði í gagngerar endurbætur á eldhúsinu á Vitatorgi. Til stóð að loka eldhúsinu í maí en þegar listería kom upp í eldhúsinu var ákveðið að flýta framkvæmdum og loka strax,“ segir í fréttatilkynningu frá borginni.

Haft er eftir Rannveigu Einarsdóttur, sviðsstjóra velferðarsviðs, að það sé mikið gleðiefni að geta hafið matarþjónustu á ný í félagsmiðstöðvunum. Samningurinn tekur gildi 2. mars en þar til verður áfram hægt að fá einfaldan mat, á borð við skyr, samlokur eða annað sem er ákveðið á hverjum stað fyrir sig.