„Eðli­lega tekur landsliðsþjálfarinn eftir því“

„Það er búið að létta af okkur svona 10 kg, loksins búnar að ná þessum sigri sem skiptir miklu máli,“ sagði Grétar Áki Andersen, þjálfari ÍR, eftir sigur liðsins í dag.

„Þetta var frábær fyrri hálfleikur þar sem við sýndum okkar réttu hliðar, við töluðum mikið um það fyrir leik að við ætluðum að sýna okkar rétta andlit á móti þessu liði. Við erum ekki búin að gera það í þremur leikjum á móti þeim í vetur. Stelpurnar voru frábærar í dag og eiga þennan sigur fyllilega skilið.“

Liðið hyggst nýta bikarúrslitahléð og landsleikjahléð vel til þess að fínstilla nokkur atriði fyrir lokasprett deildarinnar.

„Okkur líður mjög vel. Það er smá pása núna þar sem við komumst því miður ekki í final four. Landsliðshelgin kemur svo beint inn í þetta og við ætlum að reyna að slípa nokkra hluti næstu vikurnar. Við mætum svo í þessa þrjá síðustu leiki og svo er úrslitakeppnin þannig þetta er bara geðveikt gaman.“

Katrín Tinna Jensdóttir, Matthildur Lilja Jónsdóttir og Sara Dögg Hjaltadóttir leikmenn ÍR eru í leikmannahópi landsliðsins fyrir komandi leiki í undankeppni EM.

„Þetta er heiður fyrir þær hversu vel þær eru að sinna þessu. Þær eru búnar að standa sig frábærlega í vetur og þær eru búnar að gera þetta vel. Þá eðlilega tekur landsliðsþjálfarinn eftir því.“