Mayweather og Pacquiao mætast í haust

Mayweather hafði betur gegn Pacquiao í eina bardaga þeirra sem fram fór í maí 2015. Mikil eftirvænting var fyrir þeirri viðureign sem stóð ekki alveg undir nafni. Þó voru ýmis met slegin, sem höfðu öll með tekjur að gera.

4,6 milljónir manna greiddu fyrir að streyma viðburðinum sem halaði inn yfir 400 milljón dali í tekjur og yfir 70 milljónir í miðasölu.

Mayweather hætti hnefaleikaiðkun fertugur að aldri eftir sigur á Conor McGregor árið 2017 en er nú kominn aftur á fullt, tæplega fimmtugur. Hann hefur tekið þátt í sýningarviðureignum við Logan Paul og John Gotti III og þá stendur til að hann mæti Mike Tyson í hringnum síðar á þessu ári.

Nú ætli hann að taka hanskana af hillunni, endurhefja atvinnumannaferilinn og mæta Pacquiao í alvöru bardaga í haust.

„Ég hef þegar barist við Manny einu sinni og unnið hann. Í þetta skipti verður niðurstaðan sú sama,“ segir í yfirlýsingu Mayweather um komandi bardaga.

Á atvinnumannaferli sínum vann Mayweather alla 50 bardaga sem hann tók þátt í. Pacquiao hyggst enda þá sigurhrinu.

„Við Floyd gáfum hnefaleikaheiminum stærsta bardaga sögunnar. Aðdáendur hafa beðið nógu lengi og eiga endurtekningu skilið. Ég vil að Floyd lifi með einu tapi á ferli atvinnumannaferli sínum og munu ávallt muna hver lagði hann að velli,“ segir Pacquiao.

Viðburðinum verður streymt á Netflix og mun verða fyrsti hnefaleikabardaginn sem fram fer í Sphere-viðburðahöllinni í Las Vegas.