Besta fim­leika­fólk Dan­merkur gefur góð ráð og sýnir á Ís­landi

Hér erum við að tala um danska sýningarhópinn Verdensholdet, sem hefur verið á Selfossi síðustu daga að aðstoða við margt og leiðbeina hjá Fimleikadeild Selfoss. Hópurinn, sem skipar 28 manns fer líka á nokkra aðra staði á landinu en markmið heimsóknanna er að veita innblástur, miðla þekkingu og kynnast mismunandi menningu ekki aðeins með sýningum heldur líka með vinnustofum, æfingum og fræðslu. 

Á Selfossi héldu þau glæsilega fimleikasýningu en aðalsýningin verður þó í íþróttahúsinu Ásgarði i Garðabæ föstudaginn 13. mars.

„Þau eru náttúrulega bara búin að ferðast um allan heiminn og upplifa margt og þau eru alltaf glöð og jákvæð. Og þau eru með svolítið öðruvísi fimleika en við erum vön frá Íslandi. Þau æfa svona sýningafimleika þar sem það gengur ekki bara út á keppni,” segir Linda Ósk Þorvaldsdóttir, þjálfari hjá fimleikadeildinni á Selfossi.

Mikill kraftur er í starfi deildarinnar á Selfossi.

„Já, við erum með hátt í 500 iðkendur, fjögur hundruð og eitthvað alveg frá núll ára í íþróttaskólanum en við erum með risastóran íþróttaskóla og líka með risastóran meistaraflokk en við höfum aldrei verið stærri í meistaraflokk,” segir Andrea Ýr Grímsdóttir, formaður Fimleikadeildar UMF. Selfoss.

Danirnir eru ánægðir með heimsóknina til Íslands.

Fréttamaður gat ekki annað en stokkið aðeins á trampólíninu en árangurinn var þó ekkert sérstakur, allavega ekki miðað við danska fimleikafólkið.

Heimasíða liðsins frá Danmörku