„Blint í stórhríð á Vestfjörðum“

Freyja Þórisdóttir skrifar 15. mars 2026 07:37

Flateyrarvegi og Súðavíkurhlíð hefur verið lokað en fleiri vegir eru ófærir. Vísir/Vilhelm

Enn eru við gildi gular viðvaranir á Vestfjörðum en einnig óvissustig vegna snjóflóðahættu á Norðurlandi. Snjóflóðahætta verður á vegum á Vestfjörðum og hefur Vegagerðin lýst yfir hættustigi á Súðavíkurhlíð og Flateyrarvegi frá miðnætti og verður vegunum þá lokað.

Þetta er meðal þess sem kemur fram á vef Veðurstofunnar en þar spáir slyddu eða snjókomu með köflum um mestallt land en styttir upp suðvestanlands eftir hádegi. Hiti um eða rétt yfir frostmarki.

Austan 15-23 m/s og slydda eða snjókoma sunnantil og einnig norðvestanlands. Norðaustan 15-23 m/s í dag, en talsvert hægari á Norðaustur- og Austurlandi. Á að draga úr vindi í kvöld, sunnudaginn 15. mars.

Gulu viðvaranirnar eru í gildi til klukkan tíu í kvöld vegna norðaustanhríðar og gilda sem fyrr segir á Vestfjörðum en einnig á Breiðafirði, Ströndum og Norðurlandi vestra. Varað er við truflunum á samgöngum á svæðinu og á vefnum spáir slæmu skyggni og versnandi færð.

Á vef Vegagerðarinnar segir: „Erfið akstursskilyrði og blint í stórhríð á Vestfjörðum, þá sérstaklega á fjallvegum eins og t.d. Steingrímsfjarðarheiði og Klettshálsi. Útlit fyrir áframhaldandi hríð á þeim slóðum á mánudag.“

Sömuleiðis segir í hugleiðingum veðurfræðings: „Gular viðvaranir eru í gildi og er fólk hvatt að fylgjast með fréttum af færð og veðri áður ef farið er milli landshluta, einkum þó norðvestantil á landinu.“ en hægt er að fylgjast með þróun færðar á vef Vegagerðarinnar.

Í tilkynningu frá veðurfræðingi segir að erfið akstursskilyrði verði einnig að finna á Austfjörðum eftir hádegi, til að mynda á Fagradal og Fjarðarheiði. Þar segir einnig að búast megi við snörðum vindhviðum, um 35 m/s, í Öræfum í fyrstu, undir Hafnarfjalli og á Snæfellsnesi eftir hádegi og fram á kvöld, og aftur snarpar vindhviður í Öræfum í kvöld.

Veðurstofan spáir slyddu eða snjókomu í dag um mestallt land.Veðurstofan

Veðurhorfur á landinu næstu daga

Á mánudag:

Norðaustan 8-15 og él norðan- og austantil, annars þurrt að mestu. Hvessir við suðurströndina um kvöldið, hiti kringum frostmark.

Á þriðjudag:

Norðaustan 10-18, en talsvert hægari norðaustan- og austanlands. Snjókoma eða él á norðanverðu landinu, úrkomulítið suðaustantil en þurrt suðvestanlands. Hiti breytist lítið.

Á miðvikudag:

Vestlæg eða breytileg átt og bjart með köflum, en dálítil él norðaustanlands fram eftir degi. Heldur kólnandi.

Á fimmtudag:

Hlý sunnanátt og rigning eða súld, en úrkomulítið á Norðaustur- og Austurlandi. Suðvestlægari og kólnar með éljum vestast seint um kvöldið.

Á föstudag og laugardag:

Suðvestanátt og él, en bjartviðri að mestu austanlands. Frost um mest allt land.

Veður

Mest lesið

Fleiri fréttir