OpenAI kippir Sora úr sam­bandi

Þær breytingar fela meðal annars í sér að einbeita rekstri fyrirtækisins að vörum og þjónustu sem ætlað er að auka framleiðni og geta verið notaðar af bæði fyrirtækjum og einstaklingum, samkvæmt frétt Wall Street Journal. Þar er um að ræða kerfi sem notendur geta notað til að auka skilvirkni, greina gögn og kóða fyrir sig, svo eitthvað sé nefnt.

Með því vilja forsvarsmenn fyrirtækisins fara í meiri samkeppni við fyrirtækið Anthropic, sem hefur náð miklum árangri á sviði framleiðni með þjónustunni Claude.

Sex mánuðir eru síðan smáforritið Sora var gert aðgengilegt notendum og hefur það notið töluverðra vinsælda en þó sérstaklega í upphafi. Samkvæmt frétt CNBC kostaði þjónustan þó OpenAI mikla peninga en innan veggja fyrirtækisins er unnið að því að draga úr kostnaði í aðdraganda væntanlegs hlutafjáruppboðs seinna á þessu ári.

WSJ segir þar að auki að starfsmenn OpenAI hafi verið hissa á því hve stórum hluta þeirrar reiknigetu sem fyrirtækið hefur aðgang að var varið í Sora, þar sem fátt benti til þess að mikil eftirspurn hafi verið eftir þjónustunni. Nokkrar vörur og þjónustur hafa verið lagðar til hliðar að undanförnu og þá að miklu leyti vegna takmarkaðrar reiknigetu og skorts á gagnaverum.

Fyrirtækið er metið á 730 milljarða dala. Það samsvarar um 90,9 billjónum króna (tólf núll).

Altman sagði starfsmönnum að þeir sem unnið hefðu að Sora myndu snúa sér að öðrum verkefnum sem gætu reynst hagkvæmari. Nefndi hann sérstaklega stjórnun vélmenna.

Ákvörðunin felur í sér að Disney mun ekki fjárfesta milljarði dala í OpenAI en í staðinn átt gervigreindarfyrirtækið að fá leyfi til að gera notendum Sora kleift að nota persónur Disney í myndböndum.