Svona var fundurinn: Hópurinn fyrir lykilleiki á leiðinni til Brasilíu

Um er að ræða fyrstu tvo heimaleiki Íslands, gegn Úkraínu 14. apríl og sjálfum Evrópumeisturum Englands 18. apríl. 

Upptaka frá fundinum er aðgengileg hér fyrir neðan.

Tvær breytingar eru á hópnum frá síðasta verkefni, eða í raun þrjár. Linda Líf Boama, framherji Kristianstad, kemur inn sem nýliði og Arna Eiríksdóttir snýr aftur eftir meiðsli. Þá er Katla Tryggvadóttir klár eftir að hafa veikst í síðasta verkefni. Berglind Rós Ágústsdóttir og Elín Helena Karlsdóttir eru hins vegar ekki með núna, né heldur Karitas Tómasdóttir sem kölluð var inn þegar Katla veiktist.

Ísland tapaði fyrstu tveimur leikjum sínum í undankeppninni, í byrjun þessa mánaðar, á útivelli gegn Spáni og Englandi, og er því enn án stiga líkt og Úkraína. Aðeins efsta liðið kemst beint á HM en hin þrjú fara í stórt og mikið umspil.

Ætla má að Ísland og Úkraína keppist um 3. sæti riðilsins og það yrði gífurlega mikilvægt að ná því sæti. Ekki aðeins nær það lið að halda sér uppi í A-deild heldur bíður þess mun greiðari leið í gegnum HM-umspilið. 

Liðið sem endar í 3. sæti er þannig til dæmis öruggt um að þurfa ekki að spila við neina af átta bestu þjóðum Evrópu um HM-farseðil, heldur myndi það spila fyrst við lið úr C-deild og svo í versta falli við lið sem annað hvort hefur unnið sinn riðil í B-deild eða lent í 4. og neðsta sæti í sínum riðli í A-deild.

Þess vegna er algjört lykilatriði fyrir Ísland að enda fyrir ofan Úkraínu og leikurinn 14. apríl óhemju mikilvægur.