Fyrsti mót­fram­bjóðandi for­mannsins rekinn af skrif­stofunni

Bergþóra Haralds Eiðsdóttir hyggst bjóða fram lista gegn A-lista Guðrúnar Elínar Pálsdóttur, formanns og framkvæmdastjóra Verkalýðsfélags Suðurlands (VLFS). Þetta verður fyrsta mótframboðið sem Guðrún Elín fær en hún hefur verið sjálfkjörin formaður undanfarin tíu ár. Hún hefur jafnframt starfað á skrifstofu félagsins í tæpan aldarfjórðung.

Guðrún Elín sagði Bergþóru upp störfum með bréfi um síðustu mánaðamót. Í samtali við Vísi segir Bergþóra að vísað hafi verið til „heildarmats á samstarfi á vinnustaðnum“ sem rökstuðnings fyrir uppsögninni.

Hún hafi verið byrjuð að undirbúa framboð sitt áður en hún var rekin en hún viti ekki hvort Guðrúnu Elínu hafi verið kunnugt um það þegar hún sagði henni upp störfum fyrir mánuði.

Guðrún Elín staðfestir að Bergþóru hafi verið sagt upp störfum en segir að hún gefi ástæður þess ekki upp. Hún segist jafnframt ekki hafa haft neina vitneskju um að Bergþóra hygði á framboð.

Mótframboðið hefur rýmri frest

Þrátt fyrir að bæði Guðrún Elín og Bergþóra hafi auglýst framboð sín opinberlega liggur enn ekki fyrir hvenær atkvæðagreiðslan verður haldin.

Guðrún Elín segir að dagsetning liggi ekki fyrir en atkvæðagreiðsla verði líklega haldin í apríl eða maí. Þegar kjörstjórn félagsins hafi ákveðið dagsetningu þurfi A-listi uppstillingarnefndar að liggja fyrir tveimur vikum fyrir kjördag. Mótframbjóðendur hafa viku lengur til þess að leggja fram sinn lista, allt þar til sjö dagar eru til kjördags.

Bergþóra gagnrýnir að dagsetning kjörsins hafi enn ekki verið auglýst og að upplýsingar um hverjir sitja í uppstillingarnefnd og trúnaðarráði VLFS hafi verið fjarlægðar af vefsíðu félagsins.

„Ég veit ekki hvenær verður kosið, ég veit ekki hvernig verður kosið. Mér finnst þetta mjög óheiðarlegt. Við erum verkalýðsfélag og það á að vera lýðræði. Stjórnin á að fagna öllum framboðum og stjórn og uppstillinganefnd, þó að hún setji þennan lista fram, eiga að vera hlutlaus,“ segir Bergþóra.

Hún bendir á að fólk sem hafi setið í uppstillinganefnd þegar upplýsingar voru opinberar um hana hafi lýst yfir stuðningi við framboð Guðrúnar Elínar opinberleg.

Fær ekki aðgang að félagaskrá

Þar til kjörið verður auglýst segist Bergþóra ekki geta skilað inn framboðslista eða fengið aðgang að félagaskrá sem Guðrún Elín hafi í krafti stöðu sinnar.

„Þannig að ég næ ekkert í félagsmenn. Á meðan get ég ekkert kynnt mig. Þetta er ekki lýðræðislegt,“ segir Bergþóra.

Í grein sem Bergþóra skrifaði á Vísi í dag er henni tíðrætt um traust og gagnsæi innan verkalýðsfélagsins.

„Félagsmenn eiga rétt á að vita hvernig og hvaða ákvarðanir eru teknar, hvaða nefndir starfa á þeirra vegum, hvernig kosningum er háttað og hvaða leikreglur gilda. Lýðræði á ekki að vera tæknilegt atriði sem aðeins fáir skilja. Það á að vera sýnilegt,“ skrifar hún.

Í samtali við Vísi bendir hún á að hvorki fundargerðir stjórnar VLFS né ársskýrslur séu aðgengilegar á vefsíðu félagsins.

Um sautján hundruð manns eru í VLFS samkvæmt vefsíðu félagsins. Það varð til við samruna þriggja verkalýðsfélaga á Suðurlandi árið 2011: Verkalýðsfélagsins Rangæings, Verkalýðsfélagsins Samherja og Verkalýðsfélagsins Víkings. Félagssvæðið er frá Þjórsá í vestri að Lómagnúpi í austri.

Fréttin var uppfærð með áréttingu Guðrúnar Elínar um að hún hefði ekki vitað af því að Bergþóra hygði á framboð þegar ákvörðunin var tekin um að segja henni upp störfum.