Goð­sögn hleður Guð­jón Val og Gum­mers­bach lofi

Þýska þjálfaragoðsögnin Heiner Brand er afar spenntur yfir því sem er að gerast hjá liðinu en Brand er frá Gummersbach, spilaði og þjálfaði liðið á sínum tíma. 

„Þetta er besta lið sem Gummersbach hefur verið með í nokkra áratugi,“ segir Brand í viðtali við DPA en hann missir varla af heimaleik hjá liðinu, er alltaf mættur í stúkuna. „Þetta eru einu leikirnir sem ég passa upp á að dagskrá mín sé laus í kringum. Ég er orðinn miku meiri stuðningsmaður liðsins undanfarin ár.“

Sögufrægt félag

Uppgangur Gummersbach undir stjórn Guðjóns Vals síðan árið 2020 hefur verið mikill. Það í blandi við metnaðarfulla stjórn félagsins hefur séð liðið tryggja sér sæti í efstu deild á nýjan leik og gera sig þar gildandi. Nú gæti farið svo að Gummersbach tryggi sér sæti í Meistaradeild Evrópu í fyrsta sinn í tuttugu ár.“

Gummersbach á glæsta sögu. Liðið hefur tólf sinnum orðið þýskur meistari, síðast árið 1991 og einnig unnið Meistaradeild Evrópu fimm sinnum. Félagið var einn af stofnmeðlimum þýsku úrvalsdeildarinnar og varð fyrsti Þýskalandsmeistarinn í handbolta árið 1967.

Árið 2019 varð félagið fyrir áfalli þegar að fall úr efstu deild var staðfest. Árið 2020 var Guðjón Valur ráðinn inn sem þjálfari.

„Þremur árum frá fallinu árið 2019 sneri Gummersbach aftur í efstu deild, ekki síst vegna Guðjóns Vals og Christoph Schundler, yfirmanni íþróttamála hjá félaginu,“ segir í umfjöllun Handball World.

Vel samsett lið

Tveir íslenskir landsliðsmenn spila með Gummersbach. Þeir Elliði Snær Vignisson og Teitur Örn Einarsson  Þá er Garðar Ingi Sindrason, ungur og efnilegur leikmaður FH á leið til Gummersbach í sumar. 

Þýski kjarni liðsins er sterkur og mikil spenna er síðan ríkjandi fyrir komu spænska landsliðsmannsins Alex Dusjhebaev næsta sumar en leikmaðurinn er vel þekkt stærð í boltanum.   

Selst ítrekað upp

Og áhuginn meðal stuðningsmanna Gummersbach er að aukast gífurlega. Selst hefur upp fjörutíu og tvisvar sinnum í röð á heimaleiki liðsins en leikvangur liðsins tekur um 4100 manns í sæti.

„Þessi áhugi er ekki eðlilegur,“ segir Heiner Brand. „Það er gífurleg stemning í Gummersbach. Þegar að félagið var að ganga í gegnum sinn sigursælasta tíma á árunum í kringum 1970 í sinni tvö þúsund manna höll seldist upp á leiki kannski þrisvar sinnum.“

Fyrir liggur að liðum í Meistaradeild Evrópu fjölgar úr sextán í tuttugu og fjögur frá og með næsta tímabili og munu þrjú lið úr þýsku úrvalsdeildinni taka þátt í deildinni þar sem að annað og þriðja sæti þýsku deildarinnar gætu gefið þátttökurétt í Meistaradeildinni. 

Gummersbach er á mikilli siglingu um þessar mundir og vermir fjórða sæti þýsku úrvalsdeildarinnar og er aðeins einu stigi á eftir ríkjandi Þýskalandsmeisturum Fuchse Berlin sem verma þriðja sætið. Þaðan er ekki langt upp í lið Flensburgar í öðru sætinu.