Vitað um tíu dauðs­föll af völdum eldinga hér á landi

Fæstir á Suðvesturhorni landsins fóru varhluta af þeim drunum sem fylgdu þrumuveðrinu sem gekk yfir landið í gær. Eldingum laust niður með þeim afleiðingum að rafmagnslaust varð víða á Suðurlandi, Suðurnesjum og í Vestmannaeyjum.

Jarðeðlisfræðingur segir erfitt að setja til um hvort þrumu- og eldingaveður ríði oftar yfir nú en á árum áður en að meðaltali séu þrumudagar tveir á ári í Reykjavík. Eldingaveðrið í gær hafi ekki verið hefðbundið að neinu leyti.

„Það voru mjög margar eldingar í þessu veðri í gær. Um 63° fyrir norðan voru um 850 eldingar sem er mjög mikið og meira að segja þar fyrir sunnan í hafinu voru um þrjú þúsund eldingar,“ segir Þórður Arason, jarðeðlisfræðingur á Veðurstofu Íslands.

Hann segir eldingaveður fáséð hér á landi samanborið við heitari lönd og því sé almenningur líklega ekki meðvitaður um hvernig best sé að bregðast við eldingaveðri.

Hvernig á fólk að haga sér í svona veðri? Á fólk að halda sig heima? Stökkva úr sundlauginni eða úr bílnum? 

„Það var líklega enginn í sundi í gær þegar veðrið var en maður á ekki að vera úti ef maður getur. Vera bara inni í húsi eða bíll. Það er aðal atriðið.“

En er hættulegt að vera utandyra? 

„Já, það deyja mjög margir á jörðinni í eldingum. Það eru fá tilfelli á Íslandi en við vitum um tíu tilfelli á síðustu þúsund árum. En í útlöndum er mjög algengt að fólk deyi. Sérstaklega í fátækum löndum í hitabeltinu, þar bara hrynur fólk niður.“