„Við þurfum að vinna leik á mánu­daginn“

„Þetta eru auðvitað vonbrigði. Fyrri hálfleikurinn var afleitur og við setjum okkur í kjölfarið í erfiða stöðu. Við byrjum seinni hálfleikinn af fítonskrafti og náum þessu niður í tvö stig. Á einhverjum tímapunkti finna þær lausnir og við vorum að lenda í vandræðum með Abby sem var að skora mikið á okkur. Þetta eru vonbrigði en ég er að reyna að halda í mér. Ég er búinn að vera í meistaraflokki í körfubolta í 29 ár og hef ekki verið að koma í viðtöl og talað um dómgæslu, þú getur grafið það upp. Ég er gáttaður á ósamræminu í kvöld og þeir toppuðu sig svo þegar þeir tóku sóknarvillu á Pau. Maður á ekki að vera að tjá sig um þetta svona strax eftir leik og ég á eftir að horfa á þetta aftur en tilfinningin hjá okkur Óla á hliðarlínunni var að það væri ofboðslegt ósamræmi í dómgæslunni.“

Myndir þú þá segja að dómararnir hafi ráðið úrslitunum hér í kvöld?

„Nei, alls ekki en það eru augnablik þar sem dómgæslan gerir okkur erfitt. Við áttum ekki nógu góðan dag og það segir sig sjálf að maður tapar ekki leik með 19 stigum út af dómurunum. Það voru augnablik svo voru okkur þung í dag og ég er hundóánægður með ósamræmið í dag. Við höfum ekki verið að tala um dómgæslu í vetur en okkur þótti þessi leikur vera versta frammistaða sem að við höfum séð í vetur, en okkar var reyndar ekkert mikið betri.“

Fyrri hálfleikur var afar dapur hjá Njarðvík en liðið átti í miklum erfiðleikum með að koma boltanum í körfuna. Einar segir að þrátt fyrir þennan slæma fyrri hálfleik hafi liðið brugðist vel við í þeim seinni. Liðið þurfi að leika betur en þetta í 40 mínútur á mánudaginn.

„Svona er jú körfuboltinn stundum. Við skoruðum fyrstu tvær körfurnar og okkur leið ágætlega komandi inn í leikinn. Við þurfum svo að hrósa þeim líka, þær voru að gera vel varnarlega en hið augljósa er líka að við vorum ekki að hitta og vorum með einn af þrettán í þriggja stiga skotum í fyrri hálfleik. Það er erfitt og það er ekkert eins og að stelpurnar hafi verið að taka léleg skot. Við vorum að fá góð þriggja stiga skot sem við vorum að setja í upphituninni. Mér fannst þær samt bregðast vel við í seinni hálfleik og við getum tekið fullt af góðum hlutum þaðan. Þetta er svipað og í síðasta leik, slakur fyrri hálfleikur og góðir sprettir í þeim seinni. Okkur vantar miklu betri heildarframmistöðu. Skilaboðin inn í klefann núna eru einföld, við þurfum að vinna leik á mánudaginn.“