Innlent

Höfðinginn átti sig ekki á lokuninni

Freyja Þórisdóttir skrifar
Kötturinn Diego er mörgum borgarbúum kunnugur en hann heldur sig mest í Skeifunni.
Kötturinn Diego er mörgum borgarbúum kunnugur en hann heldur sig mest í Skeifunni. Facebook/Spottaði Diegó

Einn allra frægasti köttur landsins, Diego, gerði sér ferð í Skeifuna í dag, líkt og hann gerir langflesta daga. Í dag, sem og aðra rauða daga, er opnunartími sumra verslana hins vegar breyttur og virðist höfðinginn ekki alveg nógu sáttur með tiltækið. Hann virtist á mynd sem birt var á Facebook í dag hvorki skilja upp né niður í því að rennihurðirnar á verslun A4 hreyfðust ekki fet.

Diego hefur lent í ýmsum hremmingum og má sem dæmi nefna þegar hann var tekinn ófrjálsri hendi í Skeifunni í lok nóvember árið 2024. Hann hefur einnig orðið fyrir bíl en braggaðist vel eftir tvær aðgerðir og hefur náð sér á strik síðan þá.

Í dag sást til hans þar sem hann sat og beið eftir því að opnað væri fyrir sér í verslun A4 í Skeifunni en hann heldur sig þar reglulega og stendur að sögn starfsmanna vaktina oft með þeim. Ummæli við færsluna sem birt var í dag inni á Facebook-hópnum Spottaði Diegó hljóða á þennan veg:

hann fær vonandi borgað fyrir útkall fyrst að það gleymdist að segja honum að það væri lokað í dag

Hann á að hafa rafrænan aðgang þegar honum hentar

Hann skilur það alveg, hann er bara að athuga hvort það blási nokkuð inn þarna þar sem hurðarnar falla saman

Diego var til umfjöllunar í fréttum Stöðvar 2 árið 2022 þar sem fram kom að fólk væri að gera sér sérstaka ferð í Skeifuna til að berja hann augum.

Kötturinn Diegó Reykjavík Verkalýðsdagurinn

Mest lesið


Fleiri fréttir

Sjá meira


×

Mest lesið