„Ef Örvar hefði látið sig detta hefði þetta verið víti“

Stjarnan var 2-0 yfir í hálfleik í leiknum á Samsung-vellinum en KR kom til baka, skoraði þrjú mörk í seinni hálfleik og er áfram með fullt hús stiga í Bestu deildinni.

Stjörnumenn vildu fá vítaspyrnu í uppbótartíma leiksins þegar Finnur og Örvar áttust við.

„Ef Örvar hefði látið sig detta hér og ekki skotið hefði þetta verið víti. Hrós á hann fyrir að halda áfram og ná skotinu en ég held að hann [Sigurður Hjörtur Þrastarson, dómari leiksins] hefði pottþétt þurft að dæma víti ef hann hefði farið niður þegar hann togaði,“ sagði Halldór Árnason í Stúkunni í gær.

Að mati Baldurs Sigurðssonar átti Örvar ekki að þurfa að falla til jarðar til að fá vítaspyrnu í þessu tilfelli. 

„Erum við samt ekki sammála um það að þetta eigi bara að vera víti? Hann á ekki að þurfa að láta sig detta,“ sagði Baldur.

„Það er samt raunin, því miður,“ skaut Halldór inn í áður en Baldur hélt áfram.

„Þetta er nóg til að trufla hann. Í hundrað skipti af hundrað úti á velli, þegar dómari sér svona peysutog, dæmir hann um leið. Þetta er klárt víti. Ekki spurning.“

Stjarnan og KR mætast aftur í Garðabænum, í sextán liða úrslitum Mjólkurbikarsins, klukkan 20:00 á miðvikudagskvöldið.

Stjarnan hefur tapað fjórum leikjum í Bestu deildinni í röð og er í 8. sæti hennar með sex stig eftir sex umferðir.

Innslagið úr Stúkunni má sjá í spilaranum hér fyrir ofan.