„Ég er í góðu standi og með meiri trú á sjálfum mér“

„Svekkjandi niðurstaða, við fengum nógu mörg færi til að fá þrjú stig út úr þessum leik“ sagði Stefan Ljubicic eftir leikinn í dag.

„Ég kannski sérstaklega [fékk færin] þannig ég þarf að gera aðeins betur en margt bara jákvætt. Kannski smá erfiður völlur en bara svekkjandi líka að fá mark úr föstu leikatriði“

„Við erum lang sterkastir þar og það er kannski það eina neikvæða úr þessu“

Keflavík fékk færin í leiknum og var Stefan Ljubicic á því að það sem vantaði var bara að klára færin betur.

„Það er bara að setja boltann í netið, það er mjög einfalt. Við óðum í færum og áttum mun betri færi en þeir þannig ég held að það sé bara það, að skora“

Stefan Ljubicic fékk ófá færin í dag en inn vildi þó boltinn ekki fara. Framherjinn hefur þó verið öflugur fyrir Keflavík í upphafi móts.

„Mörkin eru að detta, ég er búin að skora fjögur núna þannig þetta datt bara ekki í dag og þá er bara næsti leikur“

„Það að ég sé í færum er líka bara mjög mikilvægt fyrir okkur en það er bara að vera rólegur og næsti leikur“

„Ég er í góðu standi og með meiri trú á sjálfum mér og liðið er líka bara mjög gott. Við erum með mjög marga fríska og spilum upp á okkar styrkleika og það er bara að virka“

Keflavík fær hina nýliða deildarinnar í næstu umferð og horfir það verkefni vel við Stefan Ljubicic.

„Það er bara skemmtilegt, tvö lið sem eru með stig þannig það er bara barátta. Hver einasti leikur er erfiður í þessari deild og við erum bara í stigasöfnun núna og áttum að fá þrjú í dag en það er bara næsti leikur og stefnum á þrjú stig þar“ sagði Stefan Ljubicic.