Ís­lenskt lið komið inn á heimsleikana í CrossFit

Íslenska liðið náði þessu stóra takmarki með því að ná fimmta besta árangrinum í þeim hluta undanúrslitanna sem fór fram í gegnum netið. Sjö sæti voru í boði í þessum hluta en áður höfðu þrettán lið tryggt sér sæti í gegnum undanúrslitamótin víðs vegar um heiminn.

Lið CrossFit Reykjavíkur var á eftir þremur liðum frá Bandaríkjunum og einu liði frá Argentínu.

Liðið skipa margt af efnilegasta CrossFit-fólki landsins. Í liðinu eru Bjarni Leifs Kjartansson, Rökkvi Hrafn Guðnason, Elín Birna Hallgrímsdóttir, Guðbjörg Valdimarsdóttir og Brynjar Ari Magnússon.

Liðið lagði grunninn að því að tryggja sætið með því að ná öðru sætinu í þriðju grein og vinna fjórðu grein. Það kom því ekki að sök að ná bara 21. sætinu í lokagreininni.

Íslenska liðið vann fjórðu greinina þar sem það náði að gera 187 jafnhendingar (e. clean & jerk) á tíu mínútum. Þetta var frábær frammistaða hjá okkar fólki.

Það eru fleiri Íslendingar komnir inn á heimsleikana því Björgvin Karl Guðmundsson keppir einnig í liðakeppninni. BKG er í norska liðinu CrossFit Oslo Kriger sem tryggði sér farseðilinn sinn á French Throwdown undanúrslitamótinu í París.

Alls taka tuttugu lið þátt í heimsleikunum sem fara fram í San Jose í Kaliforníufylki í Bandaríkjunum frá 24. til 26. júlí. Þetta eru tímamótaheimsleikar enda þeir tuttugustu í röðinni.

Ísland er ein tíu þjóða sem eiga lið á heimsleikunum í ár en langflest koma frá Bandaríkjunum eða átta af tuttugu. Argentína, Noregur og Ástralía eru öll með tvö lið.