Elvar: „Við vorum flatari og skrefinu eftir á“

„Þetta var bara bras frá fyrstu mínútu“, sagði Elvar þegar hann var spurður að því hvort það væri ekki erfitt að eiga við Ítalíu þegar þeir hitta nánast úr öllu.

„Mér fannst þeir hitta úr öllu og alltaf þegar maður sneri sér við þá sá maður boltann fara ofan í körfuna. Partur af því var að við vorum ekki nógu nálægt þeim og ekki nógu fastir fyrir en svo verður maður bara að hrósa þeim því þeir voru ógeðslega góðir í dag.“

Vegna þessa þá náði íslenska liðið aldrei að grípa þau tækifæri sem gáfust til að snúa dæminu við.

„Það kom aldrei neitt áhlaup hjá okkur og aldrei neitt flæði. Þeir voru svo bara betri í dag og meira beittir. Við vorum flatari og skrefinu eftir á.“

Það er einn séns í viðbót fyrir Ísland að tryggja sig áfram á næsta stig undankeppni HM en það er viðureign við Breta á sunnudag.

„Ég er bara spenntur fyrir því. Nú er maður þannig lagað búinn að fá æfingaleikinn fyrir úrslitaleikinn og það eru engar afsakanir þá við mætum bara klárir og gerum vel þar.“

Hvað þarf Ísland að passa upp á gegn Bretunum?

„Ég er nú ekki búinn að skoða þá og veit ekki hvaða menn eru að mæta en miðað við síðasta leik þá eru þetta miklir íþróttamenn. Þeir eru líkamlega sterkir þannig að við þurfum að halda þeim frá körfunni og vera ákveðnari varnarlega. Ekki hleypa þeim í sóknir sem þeim líður vel með og svo höfum við næga hæfileika í sókn. Við getum hlaupið í bakið á þeim en þannig erum við bestir.“

Ítalía fékk 20 vítaskot í fyrri hálfleik í kvöld og Tryggvi Hlinason lenti í villuvandræðum snemma í kvöld. Elvar vildi samt ekkert eyða tíma í dómgæslu kvöldsins.

„Maður er vælandi yfir þessu á gólfinu en þegar leikurinn er búinn þá verður maður að gleyma dómgæslunni. Þannig er keppnisskapið í manni. Stundum finnst manni halla á sig og stundum ekki. Það upplifa örugglega allir það sama. Ég nenni ekki að vera að væla yfir því. Það er bara áfram gakk.“