„Ég er ras­isti og ég gerði þetta viljandi“

Belgíska kraftlyftingakonan Sonita Muluh vann gull í 84 kílóa flokki á heimsmeistaramótinu árið 2024 og á að baki marga stóra alþjóðlega sigra. En henni gekk ekki jafn vel á heimsmeistaramótinu í Litháen fyrr í sumar.

Henni mistókust allar þrjár tilraunir sínar í hnébeygju. Í síðustu tilraun sinni ætlaði hún að taka 334 kíló í hnébeygju, en lóðin á annarri hlið stangarinnar rákust í hné eins aðstoðarmannsins. Atvikið truflaði Muluh, sem mistókst hnébeygjan.

Þjálfari Muluh skoraði á dómarana að leyfa henni að gera aðra tilraun en dómararnir sáu ekki atvikið og gullið rann Muluh úr greipum.

Nokkru eftir HM gerðist eitthvað óvænt sem hefur hrist upp í kraftlyftingaheiminum.

Bandaríski kraftlyftingamaðurinn Joe Sullivan greindi atvikið í myndbandi og þá birtist starfsmaður mótsins í athugasemdakerfinu. Ernestas Kusinas, eins og hann heitir, útskýrði hvers vegna lóðin rákust í hnéð á honum.

„Verst fyrir ykkur, hálfvitarnir ykkar. Ég er rasisti og ég gerði þetta viljandi af því að ég hata ykkur, helvítis skíthælarnir ykkar,“ skrifaði Kusinas.

Muluh er brugðið vegna atviksins en lyftuna má sjá hér fyrir ofan.

„Ég hef orðið fyrir rasisma á marga mismunandi vegu, en aldrei á þennan hátt,“ skrifar kraftlyftingakonan á Facebook.

Fyrst varði hún starfsmanninn þar sem hún taldi að um heiðarleg mistök hefði verið að ræða.

„Að lesa þetta núna frá sama manni er einfaldlega átakanlegt,“ skrifar Muluh. Margar tilfinningar fara um líkama hennar.

„Ég er reið. Ég hef átt í miklum erfiðleikum með svefn,“ sagði Muluh við belgíska fjölmiðilinn HLN.

Rasíski starfsmaðurinn Ernestas Kusinas hefur nú verið dæmdur í lífstíðarbann af litháíska kraftlyftingasambandinu. Sambandið mun einnig endurskoða verklagsreglur sínar og herða kröfur til þeirra sem vilja taka þátt í mótum.

Alþjóðakraftlyftingasambandið, IPF, hefur einnig tjáð sig.

„Rasismi, mismunun og hatur eiga engan stað í íþróttinni okkar,“ skrifar IPF.

Eftir atvikið hefur einnig komið í ljós að Kusinas hefur tengsl við nasisma á Facebook-prófílnum sínum.