Handbolti

Unnu leikina í riðlinum með sam­tals 32 mörkum og Króatar og Portúgalir bíða

Ingvi Þór Sæmundsson skrifar
Íslensku strákarnir sáttir inni í búningsklefa eftir sigurinn á Sviss í gær.
Íslensku strákarnir sáttir inni í búningsklefa eftir sigurinn á Sviss í gær. hsí

Ekki verður annað sagt en að strákarnir í U-18 ára landsliði Íslands hafi verið sannfærandi í riðlakeppninni á Evrópumótinu í Serbíu. Íslendingar unnu alla leiki sína með samtals 32 marka mun og næst bíður keppni í milliriðli.

Ísland vann fimm marka sigur á Sviss, 33-28, í lokaleik sínum í D-riðli Evrópumótsins í gær.

Ísland vann fyrstu tvo leiki sína í riðlakeppninni báða með miklum mun. Fyrst unnu Íslendingar Svartfellinga, 39-25, og lögðu svo Ungverja að velli, 28-41.

Ísland skoraði 113 mörk í leikjunum þremur í riðlakeppninni. Aðeins Þýskaland skoraði fleiri mörk, eða 120.

Gunnar Róbertsson, leikmaður Íslandsmeistara Vals, var markahæstur Íslendinga í riðlakeppninni með 22 mörk. Hann er sjöundi markahæsti leikmaður mótsins. Alex Unnar Hallgrímsson (Fram) og Freyr Aronsson (Haukum) skoruðu nítján mörk hvor í leikjunum þremur í riðlinum.

Íslendingar tóku með sér tvö stig í milliriðla þar sem þeir mæta Króötum og Portúgölum. Tvö efstu liðin í milliriðlunum fjórum komast í átta liða úrslit.

Ísland mætir Króatíu á morgun og Portúgal á þriðjudaginn. Króatar tóku tvö stig með sér í milliriðilinn líkt og Íslendingar.

Landslið karla í handbolta

Mest lesið


Fleiri fréttir

Sjá meira


×

Mest lesið