Þjónusta Verifone og Rapyd lá niðri

Fregnirnar fengust staðfestar frá starfsfólki bæði Sambíóakeðjunnar og Laugarásbíós en það var ekki tilbúið að koma fram undir nafni. Bæði fyrirtæki nota greiðsluposa Verifone. Starfsfólk lýsir því að bilunin hafi staðið yfir í um einn og hálfan tíma og haft þó nokkur áhrif á starfsemi.

Sýningar sem hófust klukkan átta voru nýhafnar þegar bilunin skall á samkvæmt starfsmanni Sambíóa, sem staðfestir að hún hafi haft áhrif á keðjuna alla.

„Þetta var dálítið mikið stress,“ viðurkennir starfsmaðurinn.

Laugarásbíó nýtir einnig posa frá Verifone og hafði bilunin mikil áhrif á afgreiðslu í hléi sýninga en erfitt reyndist að hefja sýningu myndarinnar aftur á réttum tíma.

Bilun í greiðslulausn Rapyb fékkst staðfest frá starfsmanni Nordica-hótels. Hann sagði að hún hefði staðið yfir í um klukkustund.

Fréttastofu reyndist ekki unnt að ná sambandi við Rapyd vegna málsins. Hjá Verifone var aðeins í boði að ræða við starfsmann sem sinnir neyðarþjónustu sem útskýrði að hann gæti ekki svarað spurningum fjölmiðla um málið.

„Ég get hvorki neitað né staðfest,“ sagði starfsmaðurinn.

Uppfært 00:50

Framkvæmdastjóri Verifone á Íslandi, Tryggvi Karl Valdimarsson, sendi fréttastofu skeyti þar sem er farið fram á að fréttinni verði breytt, auk myndar og fyrirsagnar. Tryggvi fullyrðir að engin bilun hafi átt sér stað. 

„Ég get staðfest að það var ekki bilun í kerfum Verifone,“ segir í skeytinu en engin skýring er gefin á því ástandi sem upp kom í kvöld og fékkst staðfest hjá starfsfólki tveggja fyrirtækja.