Keppti fingurbrotin á EM

Ísland fékk 140,563 stig fyrir æfingar sínar og endaði í 22. sæti af 32 liðum.

Íslenska liðið var skipað þeim Auði Önnu Þorbjarnardóttur, Lilju Katrínu Gunnarsdóttur, Kristjönu Ósk Ólafsdóttur, Rakel Söru Pétursdóttur og Thelmu.

Sú síðastnefnda keppti fingurbrotin og greip öll flug sín í æfingunni á tvíslá þrátt fyrir meiðslin. Í viðtali á heimasíðu Fimleikasambands Íslands sagðist Thelma hafa reynt að halda einbeitingu í krefjandi aðstæðum.

„Þetta er búið að vera miklu meira en vanalega. Ég þurfti einhvern veginn bara að ýta þessu frá mér og halda áfram,“ sagði Thelma. Hluti æfingar hennar á tvíslá var ný og hún kvaðst ánægð með hvernig til tókst að framkvæma þær.

„Ég er súperánægð með æfinguna og þetta er byrjunin á einhverju skemmtilegu. Seinni hlutinn af æfingunni er nýr og mig langaði virkilega að ná honum. Það tókst og ég er ótrúlega ánægð.“

Íslenska liðið átti í vandræðum í fyrstu æfingu sinni, á jafnvægisslá, en náði sér betur á strik í gólfæfingum, stökki og á tvíslá.

Thelma hefur unnið til fimm gullverðlauna á Norður-Evrópumótinu auk fjölda Íslandsmeistaratitla.