Bjart og sól­ríkt víðast hvar

Í hugleiðingum veðurfræðings Veðurstofunnar kemur fram að lægðin sem hefur verið suður af landinu fjarlægist landið og þá eigi að lægja á suðurhelmingi landsins. Vindur verði þá almennt fremur hægur fyrir norðan.

Vænta má lítilsháttar vætu á Austfjörðum og Suðausturlandi, en annars björtu og sólríku veðri víða.

Veðurfræðingur segir útlit fyrir rólegheitaveður á morgun, miðvikudag og fimmtudag, þurrt og milt, en þegar líður á fimmtudaginn verði orðið skýjað um landið vestanvert og gæti fylgt súldarloft með. Svo er að sjá að það nálgist alldjúpar lægðir með suðlægum áttum með rigningu, mest þó sunnan- og vestanlands. Hlýindin eiga þó að haldast áfram.

Greiðfært er um landið allt en þó víða vegavinna og viðgerðir. Á vef Vegagerðar er varað við steinkasti og jafnvel töfum vegna þessarar vinnu. Hraði er tekinn niður á flestum vinnusvæðum og eru ökumenn hvattir til að halda 50 metra á milli bíla til að minnka líkur á skemmdum vegna steinkasts. Vegfarendur eru beðnir um að sýna aðgát og tillitssemi.

Veðurhorfur á landinu næstu daga

Á miðvikudag og fimmtudag: Fremur hæg vestlæg eða breytileg átt og víða bjartviðri, en skýjað að mestu á vestanverðu landinu og sums staðar dálítil súld. Hiti yfirleitt 10 til 16 stig yfir daginn.

Á föstudag: Suðlæg átt, 3-10 m/s og dálítil væta á vestanverðu landinu, en annars skýjað með köflum. Hiti 10 til 18 stig, hlýjast fyrir austan.

Á laugardag (menningarnótt): Sunnan- og suðvestanátt og víða rigning vestantil, en annars skýjað og þurrt. Fremur hlýtt í veðri.

Á sunnudag: Suðaustanátt með rigningu og mildu veðri, en úrkomulítið norðaustan- og austanlands.

Á mánudag: Útlit fyrir breytilega átt með skúrum í flestum landshlutum. Áfram hlýtt í veðri.