„Verið að drekkja þeim í á­hyggjum að þetta verði bara aftur sama sagan“

United tapaði 2-0 fyrir nýliðum Hull City í 1. umferð ensku úrvalsdeildarinnar á laugardaginn. Bæði mörkin komu eftir föst leikatriði í fyrri hálfleik.

„Þetta var eiginlega úti um allt. Vandamálin þeirra áttu sér eiginlega ekkert upphaf og engan endi,“ sagði Bjarni í Messu gærdagsins og fór svo yfir varnarleik United. Honum fannst ekki mikið til frammistöðu miðvarðarins unga, Aydens Heaven, í leiknum gegn Hull koma.

„Hann var vægast sagt hræðilegur. Sjáum stöðuna á honum hérna. Hann snýr baki í [Oli] McBurnie sem stríddi honum allan leikinn. Hann veit aldrei bæði hvar boltinn er og maðurinn. Hérna sést það skýrast. Hann missir af McBurnie af því hann er að horfa á boltann og sleppir manninum,“ sagði Bjarni.

Kjartan Henry tók aðeins upp hanskann fyrir Heaven og beindi athygli sinni að Luke Shaw.

„Ég er alveg sammála því en hann er nítján ára gamall. Luke Shaw er búinn að vera þarna í tólf ár, er það ekki? Það er einhvern veginn alltaf sama holningin á honum, alltaf eitthvað tæpur og kemur síðan inn í þetta. Svo ertu með [Noussair] Mazraoui hinum megin. Með Harry Maguire, sem fékk ekki að fara á HM, en er einhvern veginn samt búinn að stíga upp sem einhver sigurvegari í þessu United-liði eða á sínum ferli allavega. Heaven var ekki sannfærandi en öll varnarlína Manchester United; þetta er bara skelfilegt,“ sagði Kjartan Henry. 

Honum fannst yfirbragð Fernandes í viðtali eftir leikinn ekki vera gott.

„Þú sérð bara að fyrirliðinn sjálfur mætir í viðtal og það er ekki mikil trú, ekki mikil ára, kassinn er ekki úti. Hann er fyrirliði Manchester United og ég held að hann sé bara þreyttur á því að vera með Patrick Dorgu frammi,“ sagði Kjartan Henry.

Miðjumennirnir Youri Tielemans og Andrey Santos spiluðu sinn fyrsta keppnisleik fyrir United á laugardaginn var.

„Við höfum allavega séð til Tielmans að hann sé góður og hann var frábær á HM í sumar og er að öllu leyti góður leikmaður. Hann á eftir að sýna það hins vegar þarna. Þetta var ekki frábært hjá honum. En Santos hins vegar, ég hef aldrei séð neitt sem réttlætir það að hann sé bara orðinn sjálfkrafa sexa hjá United. Það er bara erfitt fyrir mig að sjá það,“ sagði Bjarni og kom aftur að viðtalinu við Fernandes. 

„Vandamálin þeirra eru bara úti um allan völl og það er rétt sem Kjartan segir. Fyrirliðinn fer í viðtal og eftir einn leik á þessu tímabili byrjar hann að draga inn öll skelfilegheitin sem fylgja þeim frá síðasta tímabili. Það er bara verið að drekkja þeim í áhyggjum að þetta verði bara aftur sama sagan.“

Í næstu umferð ensku úrvalsdeildarinnar mætir United öðrum nýliðum, Ipswich Town, á Old Trafford.

Innslagið úr Messunni má sjá í spilaranum hér fyrir ofan.