„Fæ skítinn í fangið strax frá fyrsta degi“

Jón Þór var rekinn fyrir helgi eftir aðeins rúma tvo mánuði sem þjálfari karlaliðs Stjörnunnar í fótbolta. Hann lýsir því í viðtali við Gunnlaug Jónsson í Íþróttavarpi RÚV að þrátt fyrir allt hafi brottreksturinn komið sér á óvart.

Hann tók við af Jökli Elísabetarsyni sem rekinn var í júní og segir Jón Þór afar illa hafa verið staðið að þeim brottrekstri og leikmenn saknað Jökuls.

„Við skulum bara orða hlutina alveg eins og þeir eru. Þegar þjálfaraskiptin eru gerð er það bara eitt allsherjar fíaskó. Það er bara illa staðið að þeim þjálfaraskiptum, það verður bara að viðurkennast og segjast alveg eins og er,“ segir Jón Þór í viðtalinu við sveitunga sinn frá Akranesi, Gunnlaug Jónsson.

„Þegar þú skiptir um þjálfara þá gerir þú sem stjórnarmaður eða stjórnandi í félaginu hreint fyrir þínum dyrum, gagnvart leikmannahópnum og öðrum. Það eru einhverjir hlutir ekki í lagi innan klúbbsins sem gerir að verkum að þessi ákvörðun er tekin, og þá er ekkert nóg að henda einum manni út og halda að allt lagist,“ segir Jón Þór.

Loftið hafi hins vegar aldrei verið hreinsað.

„Þar af leiðandi fæ ég skítinn í fangið strax frá fyrsta degi, sem eru ekki ákjósanlegar aðstæður fyrir nýjan mann að ganga inn í á vinnustað. Ég finn það nánast frá fyrsta degi að ég er ekki velkominn.“

„Strax málaður upp sem vondi kallinn“

Aðspurður hvort hann hefði fundið það frá leikmönnum eða stjórnendum svaraði Jón Þór:

„Umhverfinu öllu. Innan félagsins þá finn ég mjög fljótlega að hjá hluta fólksins er ég strax málaður upp sem vondi kallinn í þessu.“

Margir úr leikmannahópnum hafi saknað Jökuls.

„Ég fann fyrir því á fyrsta degi. Það fór ekki framhjá neinum sem fylgist með fótbolta að sú var raunin, og svo sem ekkert athugavert við það. Jökull er góður drengur og hörkuöflugur þjálfari, miðað við það litla sem ég hef kynnst af honum. Þetta var mikið reiðarslag fyrir leikmannahópinn og ég geng bara inn í það og ber virðingu fyrir því. Það er í sjálfu sér mér óviðkomandi og ég reyndi bara að koma inn með þeim hætti að áreitið væri sem allra minnst til að byrja með,“ segir Jón Þór.

Í áfalli yfir stöðunni hjá félaginu

Í viðtalinu ber Jón Þór Stjörnunni vægast sagt ekki vel söguna og segir það til að mynda hafa komið sér í opna skjöldu að ekki væri starfandi styrktarþjálfari, sjúkraþjálfari eða fitness-þjálfari hjá félaginu. Hann hafi verið í áfalli yfir stöðunni.

Þá hafi hann ekki fengið að ráða aðstoðarmanni sínum, ekki heldur þegar Hrannar Bogi Jónsson hætti óvænt í lok júní sem aðstoðarþjálfari. Jón Þór hafði sínar hugmyndir um eftirmann Hrannars Boga en lítill tími var til stefnu.

„Ég fæ ekkert rosalega mikinn stuðning við þeim hugmyndum og þar í rauninni koma fyrstu rauðu flöggin fram, strax á fyrstu dögum í starfi. Eftir á að hyggja fékk ég ekki nærri því nógu góðan stuðning þegar þetta mál kemur upp.“

Veikindi hafi orðið að ljótum sögum

Undir stjórn Jóns Þórs hafði Stjarnan unnið tvo leiki í röð áður en liðið tapaði svo fyrir Fram í lokaleik hans í brúnni. Eftir brottreksturinn hafa ýmsar sögur farið á flug og verst þykir Jóni Þór að veikindi hans hafi komið af stað ljótum sögum. Þau hafi valdið fjarveru hans á æfingum.

„Ég er með undirliggjandi veikindi og hef átt í erfiðleikum með magann á mér. Það er eitthvað sem ég erfði frá föður mínum heitnum. Ég er veikur fyrir í maga og með magasár og bólgur,“ segir Jón Þór sem varð að hætta við að stýra æfingu á föstudeginum fyrir leikinn við Fram þegar hann hafi verið orðinn slappur.

„Það fór nú ekki betur en svo að ég rétt komst inn í klefa uppi í Miðgarði áður en uppköstin byrjuðu. Ég keyri heim upp á Akranes við hálf illan leik,“ segir Jón Þór sem hefur áður glímt við þessi veikindi og tengir þau við álag og stress.

„Það er náttúrlega ótrúlegt að þessu sé snúið upp í bara ljótar sögur. Það er auðvitað bara skammarlegt fyrir félagið að minn heiður og mín heilindi séu dregin í efa í starfi. Að ég hafi ekki sinnt starfinu mínu og verið fjarverandi á æfingum, og farið snemma heim af æfingum. Það er tilkomið vegna þessara veikinda, að undanskilinni einni jarðarför.“

„Það þarf illan hug til að búa til svona sögur upp úr þessu. Það er alveg ljóst að það eru einhverjir aðilar innan Stjörnunnar sem eru tilbúnir til þess.“