Haukur leiddi endur­komu Löwen

Löwen tók á móti nýliðum Balingen í kvöld eftir að hafa átt strembna byrjun á tímabilinu. Byrjun nýliðanna hefur aftur á móti verið vonum framar og þeir voru tveimur stigum fyrir ofan Löwen fyrir leik kvöldsins.

Balingen byrjaði töluvert betur í kvöld og komst fjórum mörkum yfir, 7-3, snemma leiks. Þeir bættu við forystuna og leiddu með fimm marka mun, 14-9, í hálfleik.

Mest náðu þeir þá sex marka forskoti, 17-11, snemma í síðari hálfleik en Haukur Þrastarson átti þá stóran hlut í að Löwen vann sig til baka þar sem hann lagði upp eitt og skoraði tvö á leið Löwen til að minnka muninn í 19-17.

Áfram börðust Ljónin og tókst með fjórum mörkum í röð að breyta stöðunni úr 22-19 fyrir Balingen í 23-22 sér í vil þegar átta mínútur voru eftir. Löwen komst 26-23 yfir þegar minna en fimm mínútur voru eftir en þá svaraði Balingen með þremur mörkum til að jafna 26-26 þegar tvær mínútur lifðu leiks.

Við tóku spennuþrungnar lokamínútur en þar tókst Löwen að knýja fram nauman 29-27 sigur.

Haukur kom beint að tíu mörkum í leiknum þar sem hann skoraði fimm og lagði fimm upp.

Eftir sigurinn jafnar Löwen andstæðinginn Balingen að stigum. Bæði eru um miðja deild með fjögur stig eftir fyrstu fjóra leikina.

Sigur í fyrsta leik hjá Viktori Gísla

Á Spáni fór tímabilið af stað í kvöld og Barcelona vann öruggan 48-32 útisigur á Logrono. Ludovic Fabregas stóð upp úr hjá Börsungum með átta mörk af línunni.

Viktor Gísli Hallgrímsson varði fimm skot í leiknum af þeim 19 sem hann fékk á sig og var því mepð markvörslu upp á 26 prósent.