Vin­konur á tíma­mótum eftir tíu ár í verslunar­rekstri

„Á þessum 10 árum höfum við byggt upp fyrirtækin, flutt endalaust oft, komið með ótal ný vörumerki á markaðinn, kynnst besta fólkinu, stækkað vöruúrvalið töluvert og svo má auðvitað ekki gleyma að samhliða öllu þessu eignuðumst við öll okkar börn,“ segir Olga Helena.

Reksturinn hafi byrjað með einni minningarbók sem hönnuð hafi verið fyrir frumburði þeirra.

„Síðan komu leikföngin, fötin, við keyptum BíumBíum, stofnuðum Pop markaði, fórum á sýningar erlendis og svo ótal margt fleira. Endalaust fjör, verkefni, áskoranir og álag síðasta áratuginn! Að hafa fengið að gera þetta allt saman með bestu vinkonu sinni sér við hlið er einfaldlega ómetanlegt,“ segir hún og að þær séu þakklátar starfsfólki, birgjum, viðskiptavinum og auðvitað fjölskyldum okkar.

Hún segir þær enn verða með puttana í rekstrinum en þær séu spenntar fyrir næsta kafla.