Ætla að refsa sigursælasta liði Pól­lands

„Við erum bara klárar fyrir þennan slag sem við erum að fara í,“ segir Þórdís Elva í samtali við Vísi. Pólska liðið vant því að vinna titla, er það sigursælasta þar í landi, en það hræðir ekki. 

„Það er bara sama hér. Blikar eru vanir því að vinna titla. við vitum hvað við getum gert og við ætlum bara að halda í okkar leik.  Við ætlum að halda áfram að byggja ofan á það sem við erum búin að vera að gera. Það er búið að ganga vel og við erum ekkert að fara að stíga af bensíngjöfinni núna.“ 

Hvað þarf að ganga upp hjá ykkur til þess að sigla heim sigri hér á heimavelli? 

„Við þurfum bara að vera klókar og lesa leikinn vel í byrjun og sjá hvernig þær ætla að stilla sér upp. En svo þurfum við bara að halda áfram að gera það sem við erum góðar í að gera, refsa liðum þegar við erum að vinna boltann hátt á vellinum. Við erum bara ógeðslega góðar í því þegar við gerum það vel. 

Lið Breiðabliks nýtur þess að taka þátt í svona Evrópukeppni. Útsláttarkeppni frá upphafi til enda.  

„Það er mjög gaman að fá svona leiki inn á milli. Við erum að hoppa úr leik í deild og beint í Evrópuleik og fáum svo leik í Vestmannaeyjum á laugardag. Þetta er bara ævintýri og skemmtilegt. Maður þarf alveg að kúpla sig inn og út á milli keppna og þetta er bara eins og þetta á að vera, nóg af leikjum og stutt á milli.“

Viðtalið við Þórdísi Elvu má sjá í heild sinni í spilaranum hér ofar í fréttinni. Leikur Breiðabliks og Czarni Sosnowiec hefst klukkan fjögur í dag og verður sýndur í beinni útsendingu á Sýn Sport Ísland.