Kominn fram úr Zlatan og Ronaldo

Haaland skoraði tvö marka Noregs í 3-2 sigri í gær. Hann kom Noregi 2-0 yfir og skoraði svo sigurmarkið eftir að Danir höfðu jafnað 2-2.

Hann er þá alls kominn með 64 mörk fyrir Noreg og það í aðeins 56 leikjum. Það gerir 1,14 mörk í leik með landsliðinu.

Með mörkum gærkvöldsins komst Haaland fram úr Zlatan Ibrahimovic, sem skoraði 62 mörk í 122 leikjum fyrir Svíþjóð, og Ronaldo, sem skoraði 62 mörk í 98 landsleikjum fyrir Brasilíu.

Haaland er jafn þeim Aleksandar Mitrovic frá Serbíu (106 landsleikir) og Teerasil Dangda frá Taílandi (130 landsleikir) í 35. Sæti yfir markahæstu landsliðsmenn sögunnar.

Vel má vera að hann klífi frekar upp þann lista á næstu dögum þar sem Noregur á þrjá leiki í viðbót í landsliðsglugganum. Næstur fyrir ofan Haaland er Didier Drogba með 65 mörk í 105 landsleikjum fyrir Fílabeinsströndina.

Haaland á töluvert í land að ná Cristiano Ronaldo sem hefur skorað 146 mörk í 234 landsleikjum fyrir Portúgal en Ronaldo er enn að og spilaði með Portúgölum gegn Wales í gær.

Topp 10:

1. Cristiano Ronaldo – Portúgal – 146 mörk – 234 leikir
2. Lionel Messi – Argentína – 125 mörk – 207 leikir
3. Ali Daei – Íran – 108 mörk – 148 leikir
4. Sunil Chhetri – Indland – 95 mörk – 157 leikir
5. Romelu Lukaku – Belgía – 93 mörk – 132 leikir
6. Mokhtar Dahari – Malasía – 89 mörk – 142 leikir
7. Robert Lewandowski – Pólland 89 mörk – 167 leikir
8. Ali Mabkhout – UAE – 85 mörk – 115 leikir
9. Harry Kane – England – 85 mörk – 121 leikur
10. Ferenc Puskas – Ungverjaland – 84 mörk – 89 leikir

*Feitletraðir enn að spila fyrir sín landslið. Messi hættir eftir yfirstandandi glugga.