Hlaut fyrstu verð­laun fyrir rann­sókn í sjúkra­þjálfun

Verðlaunin voru veitt í borginni Tartu í Eistlandi á laugardag á rannsóknarþingi sem fram fór í Háskólanum í Tartu fyrir hagnýt heilbrigðisvísindi. Verðlaunin eru á vegum samtakanna Enphe, sem stendur fyrir „European network of physiotherapy in higher education“.

Alls voru 46 evrópsk rannsóknarverkefni valin til að keppa til úrslita. Fyrstu verðlaunin hlaut Dagbjört Ósk fyrir rannsókn á grindarbotnseinkennum íslenskra kvenna sem greindar hafa verið með vefjagigt. Í öðru sæti varð rannsókn frá háskólanum í Brussel í Belgíu en þriðja sæti hlaut rannsókn frá háskólanum í Utrecht í Hollandi.

„Það er bara gaman að fá viðurkenningu fyrir alla vinnuna sem fór í þessa rannsókn,“ sagði Dagbjört eftir að hafa tekið við verðlaununum en leiðbeinendur hennar voru doktor Kristín Briem og doktor Þorgerður Sigurðardóttir.

„Ég vona að verkefnið og niðurstöðurnar veki athygli þannig að fleiri kynni sér kvenheilsutengd vandamál og geti notað niðurstöðurnar til að hjálpa sér í starfi.“

Dagbjört segir einnig ánægjulegt að vera efst af þeim nærri fimmtíu verkefnum sem voru talin hæf til að vera send inn.

„Þetta voru allskonar rannsóknir sem voru með mjög mismunandi áherslur og með mjög flottum niðurstöðum einnig. Þannig að það gerir þetta ennþá betra.“