Strákarnir í íslenska U-21 árs landsliðinu unnu sinn riðil í undankeppni HM með fullu húsi.
Ísland vann Serbíu með tveggja marka mun, 34-32, í síðasta leik sínum í dag. Íslendingar höfðu áður unnið Litháa og Grikki örugglega.
Ísland var komið á HM fyrir leikinn í dag en strákarnir gáfu hvergi eftir og unnu þriðja sigurinn á jafnmörgum dögum.
Serbar voru með frumkvæðið framan af fyrri hálfleik en þökk sé góðum 4-1 kafla leiddu Íslendingar með tveimur mörkum í hálfleik, 18-16.
Ísland náði mest fimm marka forskoti í seinni hálfleik en Serbarnir voru aldrei langt undan og héngu í Íslendingum allt til loka. Á endanum munaði tveimur mörkum á liðunum, 34-32.
Elvar Örn Jónsson var markahæstur í íslenska liðinu með níu mörk. Samherji hans hjá Selfossi, Teitur Örn Einarsson, kom næstur með fimm mörk. Allir útileikmenn íslenska liðsins komust á blað í leiknum í dag.
Arnar Freyr Arnarsson og Ómar Ingi Magnússon, sem voru kallaðir til Serbíu úr verkefni A-landsliðsins í Danmörku, komu ekkert við sögu í leiknum í dag.
HM U-21 árs liða fer fram í Alsír í júlí.
Mörk Íslands:
Elvar Örn Jónsson 9
Teitur Örn Einarsson 5
Sveinn Jóhannsson 3
Leonharð Þorgeir Harðarson 3
Óðinn Þór Ríkharðsson 3
Kristján Örn Kristjánsson 2
Sturla Magnússon 2
Aron Dagur Pálsson 2
Gísli Þorgeir Kristjánsson 2
Sigtryggur Rúnarsson 2
Hergeir Grímsson 1
Strákarnir kláruðu riðilinn með fullu húsi
Tengdar fréttir
Strákarnir þurftu ekkert á Arnari Frey og Ómari Inga að halda | Komnir á HM
Íslenska karlalandsliðið skipað leikmönnum 21 árs og yngri er komið á HM sem fer fram í Alsír næsta sumar.
Óðinn skoraði ellefu mörk þegar strákarnir unnu Litháa
Íslenska 21 árs landsliðið byrjaði vel undankeppni fyrir HM U-21 landsliða en íslenska liðið vann sjö marka sigur á Litháen, 32-25, þrátt fyrir að leika án tveggja lykilmanna.
Annar sjö marka sigur hjá strákunum
Íslenska karlalandsliðið í handbolta skipað leikmönnum 21 árs og yngri er með fullt hús í sínum riðli í undankeppni HM eftir sigur á Grikkjum í dag, 24-31.
