Valsstúlkur í 8 liða úrslit

Valur tryggði sér í dag farseðilinn í 8 liða úrslit Evrópukeppni kvenna í knattspyrnu þegar þær burstuðu Alma frá Kazakstan 8-0 í B-riðli 2. umferðar keppninnar. Margrét Lára Viðarsdóttir skoraði 4 mörk fyrir Val, Málfríður Erna Sigurðardóttir tvö en Dóra Stefánsdóttir og Rakel Logadóttir eitt mark hvor. Þetta var þriðji og síðasti leikur Vals í riðlinum og hafna þær í 2. sæti en tvö efstu lið hvers riðils komast í 8 liða úrslit. Aðeins einu marki munaði að Valur ynni riðilinn og er þar um að ræða markið sem Valskonur fengu á sig í viðbótartíma gegn Djurgården/Älvsjö fyrr í vikunni en sænska liðið vann serbnesku meistarana í Niš, 7-0 í dag og hafnaði efst með fullt hús stiga. 8-liða úrslitin verða leikin 8. og 19. október, heima og heiman.