Mikel að eyðileggja feril sinn hjá Chelsea?

John Obi Mikel, miðjumaður Chelsea, á það á hættu að eyðileggja feril sinn hjá Chelsea, ef marka má föður leikmannsins, Michael Obi. John Obi Mikel hefur farið illa af stað með Chelsea en hann var rekinn af velli gegn Reading á dögunum og hefur einnig fengið sekt frá félaginu fyrir að mæta of seint á æfingu.

„Við tökum öll þátt í ferlinum hjá honum og vonandi fáum við að sjá betri Mikel. Vonandi sjáum við hann fljótlega í baráttunni á nýjan leik þar sem hann hagar sér vel, því að þjálfarinn elskar hann,“ sagði Michael Obi en John Obi Mikel virðist einnig eiga erfitt með aðlagast lífinu hjá Chelsea.

„Við erum mjög leið og móðir hans hefur miklar áhyggjur. Við erum búin að reyna að ná í hann en strákurinn er hættur að svara í símann sinn. Ég bjóst við að hann einbeitti sér að ferlinum sínum. Ég skil ekki af hverju hann hagar sér svona,“ bætti Michael Obi við.