Ekki á leið til Tottenham

Norski vængmaðurinn Morten Gamst Pedersen hjá Blackburn hefur vísað þeim orðrómi að hann sé á leið til Tottenham í janúar algjörlega á bug og segir Tottenham engu betra lið en Blackburn.

Tottenham hefur verið í vandræðum með að manna stöðuna á vinstri vængnum og Pedersen hefur verið orðaður nokkuð við Lundúnaliðið að undanförnu. Hann segir þó ekkert í kortunum benda til þess að hann fari frá Blackburn.

"Það er alltaf jákvætt að lið séu að sýna manni áhuga, því það bendir til þess að maður sé að gera góða hluti á knattspyrnuvellinum. Ég er hinsvegar ánægður hjá Blackburn og Tottenham er ekkert betra lið en Blackburn ef staðan í deildinni er skoðuð, við erum að koma saman fínu liði hérna," sagði Norðmaðurinn.