Chimbonda verður áfram hjá Wigan

Franski landsliðsbakvörðurinn Pascal Chimbonda segist muni verða áfram í herbúðum enska úrvalsdeildarliðsins Wigan, en hann fór fram á að verða seldur frá félaginu eftir síðasta leik liðsins í vor. Leikmaðurinn hefur verið orðaður við Tottenham í allt sumar, en staðfesti í samtali við Sky-sjónvarpsstöðina í dag að hann færi hvergi.

"Það er ljóst að ég fer hvergi og verð örugglega áfram hjá Wigan, þar sem stefnan er sett á að bæta árangurinn síðan í fyrra. Stjórnin og þjálfarinn hafa aldrei misst trúna á mér og því eru engin vandamál uppi á borðinu," sagði Chimbonda sem fyrir skömmu lýsti því yfir opinberlega að hann vildi fara frá félaginu.