Barcelona yfir í hálfleik

Nú er kominn hálfleikur í viðureignum kvöldsins í meistaradeild Evrópu. Barcelona er að eiga náðugt kvöld í rigningunni á Nou Camp og hefur yfir 2-0 gegn Levski Sofia, Chelsea hefur yfir 1-0 gegn Werder Bremen og markalaust er hjá PSV og Liverpool í Hollandi.

Það voru Iniesta og Giuly sem skoruðu mörk Barcelona gegn Levski, þar sem heimamenn hafa átt nokkuð náðugt kvöld gegn lánlausum gestunum. Michael Essien skoraði mark Chelsea gegn Werder Bremen, en þar hefur nokkuð jafnræði verið með liðunum og ekki hægt að segja að Englandsmeistararnir séu almennilega komnir í gang.

Valencia lenti undir 1-0 gegn Olympiakos á útivelli, en þar er framherjinn Fernando Morientes búinn að koma Valencia í 2-1 með tveimur mörkum. Markalaust er í leikjum PSV og Liverpool, Bayern og Spartak Moskvu, Sporting og Inter Milan, Galatasary og Bordeux og svo í viðureign Roma og Shaktar Donetsk.