Mótmæli við þinghúsið í Búdapest

Um fimm hundruð manns eru nú fyrir utan þinghúsið í Búdapest í Ungverjalandi þar sem þess er krafist að Ferenc Gyurcsany, forsætisráðherra Ungverjalands, segi af sér.

Mikil átök brutust út milli mótmælenda og lögreglu í Ungverjalandi í nótt þegar hópur mótmælenda réðst inn í höfuðstöðvar ungverska ríkissjónvapsins og krafðist þess sama eftir að í ljós kom að forsætisráðherrann laug um efnahagsástandið í landinu stuttu fyrir kosningar í apríl. Á upptökum sem bárust til fjölmiðla, heyrist forsætisráðherrann ræða við þingmann um þessar röngu upplýsingar sem hann gaf þjóðinni. Að minnsta kosti hundrað og fimmtíu borgarar slösuðust í átökunum í nótt og um eitt hundrað lögreglumenn. Lögreglan beitti táragasi á fólkið sem kastaði flöskum og steinum í átt að henni.