Ánægður með óvænt gengi Celtic

Gordon Strachan var að vonum ánægður með sigur sinna manna í Glasgow Celtic á portúgalska liðinu Benfica í Meistaradeildinni í kvöld. Hann segir árangur liðsins til þessa í keppninni framar sínum björtustu vonum.

"Við vorum að spila við mjög gott lið, lið sem lagði Liverpool og Manchester United á síðustu leiktíð. Frammistaða minna manna var frábær í kvöld og setur okkur í góða stöðu í riðlinum. Ef einhver hefði boðið mér sex stig eftir fyrstu þrjá leikina í þessum riðli í sumar - hefði ég glaður tekið þau," sagði Strachan ánægður. "Það yrði frábært fyrir okkur að ná að komast upp úr þessum sterka riðli og ég held að það yrði líka stórt skref fyrir skoska knattspyrnu, því uppistaðan í okkar liði er skoskir leikmenn," sagði Strachan.