Bifreið borgarstjóra stolið

Bifreið Michaels Bloomberg, borgarstjóra í New York, var stolið í dag. Aðstoðarmaður borgarstjórans var laminn í andlitið og hann dreginn út úr bílnum sem síðan var ekið á brott. Bíllinn er Lexus, ágerð 2001. Bloomberg var sjálfur ekki í bílnum þegar honum var stolið. Aðstoðarmaður hans var þá að erinda fyrir hann í Hackensack í New Jersey.

Það var þá sem kona gekk að bílnum, barði á rúðuna og bað um peninga. Aðstoðarmaður borgarstjórans sagðist ekki ætla að láta hana fá fé og skipti þá engum togum að karlmaður opnaði bílinn og reifst við þann sem inni í honum sat.

Til átaka kom sem lauk með því að aðstoðarmaður Bloombergs var dreginn út úr bílnum sem var síðan stolið. Bíllinn fannst 2 klukkustundum síðar þar sem hann hafði verið yfirgefinn í Fair Lawn í New Jersey. Mannsins og konunnar er enn leitað.

Aðstoðarmaður borgarstjórans, sem er 62 ára, meiddist aðeins lítilega í atganginum.