Southgate hefur engar áhyggjur

Gareth Southgate, stjóri Middlesbrough í ensku úrvalsdeildinni, segist aðeins vera að einbeita sér að því að vinna vinnuna sína þó undanþága hans til að þjálfa liðið falli úr gildi eftir 9 daga.

Southgate er aðeins 36 ára gamall og var óvænt ráðinn knattspyrnustjóri Boro í stað Steve McClaren þó hann hefði enga reynslu af þjálfun. Hann er því eðli málsins samkvæmt ekki með tilskilin þjálfunarréttindi frá evrópska knattspyrnusambandinu og undanþágan sem honum var veitt í upphafi leiktíðar rennur út eftir aðeins 9 daga. Það er því komin upp ansi neyðarleg staða í herbúðum félagsins, en stjórinn sjálfur segist engar áhyggjur hafa af þessu.

"Ég tek því sem að höndum ber í þessu og hef engar áhyggjur. Ég held bara áfram að vinna vinnuna mína og ef einhver kemur til mín og segir að ég megi það ekki lengur - verð ég auðvitað bara að hætta. Ég vil gjarnan halda áfram og reyna að ná góðum árangri með liðið, því mér finnst ég þurfa að sanna mig í starfinu. Það er hinsvegar í höndum stjórnarinnar að finna lausn á því hvort ég fæ að halda áfram og vonandi ná þeir að landa þessu máli á farsælan hátt," sagði Southgate.