Redknapp ætlar að versla í janúar

Harry Redknapp, stjóri Portsmouth, ætlar sér að versla sér varnarmenn til að styrkja hóp sinn í janúar til að koma í veg fyrir meiðslakrísu eins og þá sem hann stendur frammi fyrir skömmu fyrir mikilvægan leik gegn Manchester United um helgina.

"Ég sagði fyrir tímabilið að loksins nú gætum við sleppt því að hafa áhyggjur af leikmannamarkaðnum í janúar af því nú værum við komnir með sterkan hóp - en þá missum við nokkra varnarmenn í meiðsli og nú á ég ekki nema í mesta lagi einn leikmann til að hlaupa í skarðið fyrir þá.

Meiðsli manna eins og Glen Johnson og Linvoy Primus koma mjög illa við okkur, en ef við getum ekki veitt Manchester United góða keppni nú, eftir svona góða byrjun í deildinni - getum við það líklega aldrei," sagði Redknapp og bætti því við að hann ætlaði jafnvel að kaupa einn til tvo leikmenn í janúar.