Endurkjör Mugabe forseta íhugað

Leiðtogar í Zanu stjórnmálaflokknum sem er ráðandi í Zimbabwe íhuga í dag hvort þeir eigi að styðja Robert Mugabe forseta til endurkjörs á næsta ári.

Mugabe hefur lýst yfir eindregnum áhuga á að halda áfram í embættinu. Hann er hins vegar undir miklum þrýstingi frá hópum innan flokksins að hætta og enda þannig stjórnmála- og efnahagskreppuna í landinu.

Leiðtogar í sunnanverðri Afríku samþykktu að forseti Suður-Afríku Thabo Mbeki skyldi hvetja til stjórnmálaumræðu innan Zimbabwe. Í fréttatilkynningu lýstu þeir yfir samstöðu með forsetanum. Þeir hvöttu einnig vestræn ríki að láta af refsiaðgerðum og að Bretland greiddi fyrir uppskiptingu landareigna.

Stjórnarandstöðuflokkurinn MDC sem berst fyrir lýðræðislegum umbótum hefur lýst yfir vonbrigðum með fundinn. Hann segir vandamál Zimbabwe, stjórnaróreiðu og mannréttindabrot vera sök Mugabes.