Milan segist ekki ætla að selja Kaka

AC Milan ætlar sér ekki að selja Kaka þrátt fyrir að faðir Brasilíumannsins hafi fundað með Real Madrid. Adriano Galliani, varaforseti AC Milan sagði fréttamönnum þetta í morgun. „Við getum staðfest að Kaka verður ekki seldur en við vissum af fundi föður hans með Real þar sem hann hafði þegar sagt okkur frá honum."

Galliani sagði síðan að vegna mismunandi skattalaga gætu spænskir klúbbar borgað leikmönnum sínum hærri laun en ítalskir og að þess vegna hefði fundurinn átt sér stað. Kaka var einn af bestu leikmönnum AC Milan í vetur og átti stóran þátt í því að Milan vann meistaradeild Evrópu í sjöunda sinn í vor.