Ódýrara að hringja

Frá og með deginum í dag er mun ódýrara fyrir íbúa á Evrópusambandssvæðinu að hringja milli landa innan ESB. Forstjóri Póst- og fjarskiptastofnunar segir Evróputilskipun þess efnis lækka farsímareikning margra Íslendinga en þó ekki alveg strax.

Tilskipunin var undirrituð á miðvikudaginn og hún tók gildi í dag. Símafyrirtækin evrópsku geta nú aðeins innheimt að hámarki jafnvirði rúmlega fjörutíu krónua á mínútu, fyrir utan virðisaukaskatt, þegar íbúar ESB nota farsíma í öðru sambandsríki og og jafnvirði tuttugu króna á mínútu, fyrir utan virðisaukaskatt, þegar tekið er við símtali frá öðru ESB landi. Málið fékk skjóta afgreiðslu á mælikvarða ESB en Framkvæmdastjórnin lagði það fram fyrir tæpu ári. Eftir eitt og hálft ár verður farið yfir áhrift tilskipunarinnar og kannað hvort setja eigi einnig hámarksverð á smáskilaboð.

Evrópskir farsímanotendur eru að vonum ánægðir. Einn pólskur námsmaður í Berlín í Þýskalandi segist hafa komið til borgarinnar fyrir 3 árum. Hann hafi tekið með sér farsímann sinn frá Póllandi þar sem hann hafi þurft að bíða í mánuð eftir þýskum farsíma. Á meðan hafi hann notað símann sinn til að hringja í ættingja. síðan hafi hann fengið reikning upp á jafnvirði rúmlega fimmtíu þúsund króna.

Hrafnkell V. Gíslason, forstjóri Póst- og fjarskiptastofnunar, segir tilskipunina koma til með að hafa áhrif hér. Óvíst sé þó hve lækkunin verði mikil. Hún verði minni í Norðvestur Evrópu en til að mynda í Suður- og Austur-Evrópu þar sem gjöldin hafi verið mjög há. Hann segir símafyrirtækin íslensku taka breytingunni fagnandi því sökum þess hve íslenski markaðurinn sé lítill hafi þeim reynst erfitt að semja um hagstæð kjör við erlend fyrirtæki. Hrafnkell segir þó óvíst hvenær tilskipunin taki gildi hér. Málið eigi eftir að fara í formlegan farveg EES-samningsins. Hrafnkell segir að þetta nái ekki að taka gildi fyrir lok sumafría en vonandi fyrir lok árs.