Liverpool er eins og Duracell kanínan

Eric Gerets, þjálfari franska liðsins Marseille, hrífst mjög af dugnaði leikmanna Liverpool á knattspyrnuvellinum og líkir þeim við Duracell kanínuna.

Þessi bleika kanína rafhlöðuframleiðandans er heimsþekkt fyrir óþrjótandi frammistöðu sína í auglýsingum í gegn um árin og þjálfara franska liðsins datt hún í hug þegar hann fylgdist með vinnusemi leikmanna Liverpool þegar þeir lögðu Manchester United um helgina.

"Ég hafði mjög gaman af að fylgjast með Liverpool spila gegn United og hef gaman af svona hröðum leik. Liverpool var eins og Duracell kanínan og eru öðrum liðum góð fyrirmynd með vinnusemi sinni. Það er eins og þeir séu bara trekktir upp og sleppt út á völlinn," sagði Gerets, en lið hans mætir Liverpool í Meistaradeildinni í kvöld.