Sigurður hættur hjá Solna

Samkvæmt sænskum fréttamiðlum hefur Sigurður Ingimundarson ákveðið að hætta sem þjálfari sænska úrvalsdeildarfélagsins Solna Vikings.

Liðið tapaði fyrir nýliðum Örebro á heimavelli á þriðjudaginn og er fullyrt að leikmenn hefðu ekki haft trú á Sigurði.

„Hann hefur ekki náð til leikmanna á þeim mánuði sem hann hefur verið hér," sagði Jan Marklund, formaður félagsins, í samtali við sænska ríkisútvarpið. „Hann ákvað því að hætta."

„En við eigum eftir að ræða við leikmenn og heyra hvað þeir hafa að segja. Það gæti vel verið að Sigurður verði áfram," sagði svo Marklund enn fremur.

En miðað við fréttaflutninginn eru litlar líkur á að Sigurður verði áfram upp úr þessu.